I vini
Un cincin di intindidôrs
Il Friûl al è cognossût ator pal mont pe sô grande tradizion te produzion dai vins, vins blancs soredut. La culine e planure furlanis a svantin un grant numar di denominazions DOCG e DOC cun carateristichis e estensions diferentis: Collio, Colli Orientali del Friuli, Friuli Grave, Friuli Latisana, Friuli Aquileia, Friuli Isonzo e Friuli Annia a son lis DOC, Colli Orientali del Friuli Picolit, Ramandolo e Rosazzo a son lis DOCG.
A son ancje un grum di cualitâts autoctonis, tipichis dal Friûl. Tra i blancs, dongje dal famôs Friulano (il vecjo Tocai) o ricuardìn la Ribuele Zale, la Malvasie Istriane, il Picolit e il Verduç Furlan. Il Pignûl, il Refosc dal Pecol Ros e il Sclopetin a son invezit i plui famôs vins neris origjinâi furlans.
Il Friulano (ex Tocai Furlan)
Bruno Pizzul al à dit: "Se il Tocai al è un vin che al vâl, al valarà ancje se si clame Friulano, o vin di rassegnâsi e lâ indevant". E cussì o vin fat. Une querelle burocratiche europeane lu veve condanât: il Tocai furlan, dopo une lungje vite, al è muart ai 31 di Març dal 2007, par tornâ a vivi cul gnûf non di Friulano il prin di Avrîl dal 2007. Al à scugnût cambiâ non pe omonimie cul Tokay ongjarês, dut un altri vin come tipologjie (il Tocai furlan al è sec, chel ongjarês al è dolç) e ancje pe cualitât di ue doprade.
Al à un profum rafinât, floreâl, masculin e cun tonalitâts verdulinis. Il savôr al è plen e di fuarte personalitât, cuntun ricuart finâl di mandulis. Al è il blanc plui amât dai furlans, ancje cumò cul gnûf non. Al va cerçât a une temperadure tra i 8° e i 10°.
La Ribuele Zale
Tra i vins autoctons al è chel plui antîc (1299). Vuê al da vite a vins interpretâts in mûts diferents: tant che blanc zovin – cuntune struture lizere e une frescjece plasevule, un nâs delicât, imediât e sflorît che si manten ancje tal palât –; tant che vin otignût lassantlu lavorâ cu la trape e dopo afinât te bote; infin tant che otime base di spumant, gracie ae intuizion di un produtôr di Cuar di Rosacis che tal 1987 al saltà fûr cu la prime Ribuele zale brut (otigninude dopo agns di sperimentazion), adatant la tecniche Charmat al particolâr prodot.
Spumant cuntune sbrume compate e sotîl e un perlage finissim, un grum adat al invecjament. Tacant di chel prin esperiment, tai ultins agns a son diviersis lis aziendis furlanis che a produsin vins spumants de Ribuele zale. Si à di cerçale frescje par preseâ il so gnerf: 8-10° C.
Il Pignûl
Al è il vêr, grant vin neri di invecjament autocton de regjon, e un dai plui impuartants vins neris in dute Italie, bon di invecjâ ancje par une vore plui di vincj agns.
Un colôr di rubin intens, cun sfumaduris profondis. Un nâs une vore personâl e tonalitâts diferentis: usmis di pomulutis rossis ben maduridis, marascjis, e insieme incens, len di sagristie, odôr di bosc, di cjicolate fondente. Invecjât, al devente plui speziât. Un gust fuart, dulà che i tanins si fasin sintî ma a son ben belançâts. L'afinament al scuen jessi fat in barrique e ancje par une vore di timp – un grum di plui di 24 mês – par che si puedi esprimi in dute la sô fuarce. Il prin document che lu ricuarde al è dal 1398. Al covente servît tra i 16° e i 18°.