Le specialità

La tradizion dal purcit, de ocje e des bestiis di curtîl, la trute, regjine de aghe dolce, i prodots dal mâr, il formadi e i prodots de latarie, lis verduris di mont e di plan, lis conservis, vueli e asêt, lis pomis e i prodots fats cu lis pomis, la mîl. La culture gastronomiche dal Friûl si è costruide tal timp par podê conservâ i prodots dal lavôr de tiere e de stale, e par valorizâ la origjinalitât e il savôr cussì speciâl di ognidun. Il risultât al è spes straordenari, cualchi volte unic, come il persut di Sant Denêl, simbul di ce che e vûl dî cualitât des nestris bandis.

Il segret di cheste ecelence gastronomiche nostrane al è il microclime di Sant Denêl, risultât dal incuintri des corints frescjis che a rivin jù de mont cun chês umidis dal Adriatic. In plui, la nature moreniche dal teren e jude la ventilazion, influençant la percentuâl di umiditât e garantint l'ecuilibri miôr pe stagjonadure. La produzion e partìs di purcits, simpri talians, seguîts te lôr cressite e alimentâts in maniere controlade. La lavorazion e tache cu la sielte des cuessis plui bielis che a àn di jessi almancul 12 kg di pês. Si passe dopo ae saladure, ae pressadure e a une pre-stagjonadure di 3 mês. Dopo di cheste fase, lis cuessis a son lavadis e picjadis tai salons di stagjonadure par almancul altris 8 mês. Ta chel mentri i persuts a son stucâts cuntun misturot di farine e gras di purcit, che al fâs di mût che la cjar, dulà che no je crodie, no vedi di secjâsi masse. Ae fin dai 13 mês dal inizi de lavorazion, il nestri persut al ven segnât cu la marche dal Consorzi, par mostrâ che al è un autentic Persut di Sant Denêl. 

Chest formadi deliziôs al nas e al cjape il non de mont dal Montâs tes Alps Juliis. La sô produzion, tacade tor dal 1200 tes valadis de Cjargne, tal timp si è slargjade ae planure furlane e venite, restant però fedêl aes regulis une vore strentis de sô tradizion.  Al è un formadi di lat di vacje, a paste cuete, semidure, cuntun savôr particolâr, morbit e delicât, ecuilibrât, no masse fuart. Facil di digjerî, al è l’ideâl pai fruts e pai anzians. Si pues cjatâlu fresc cuntune stagjonadure di 60 a 120 dîs, mezan vâl a dî stagjonât di 5 a 10 mês e dal gust plen e decîs, stagjonât par plui di 10 mês e un grum saurît, o ben stravecjo, cuntune stagjonadure di plui di 18 mês e bon par jessi gratât.